- Mahe Ramzan Ka Taruf, Ahmiyat, Fazilat

 Maahe Ramzaan ka Taaruf:

1. Maahe Ramzaan Allaah azzawajal ka Naam Hai: Maahe Ramzaan, Rehmaanazzawajal ki tarha Allaah azzawajal ka ek naam hai.

2.   Maahe Ramzaan Allaah azzawajal ka Mahina Hai: Iss mahine me din raath Allaahazzawajal ki ibaadath hoti hai lihaza iss maah ko Share ramzaan yaani Allaah azzawajal ka mahina kaha jata hai.  Jaisa masjid-o-kaba ko Allaahazzawajal ka ghar kehete hai ke waha Allaahazzawajal ke hi kaam hote hai aise hi ramzaan Allaah azzawajal  ka mahina hai ke iss mahine me Allaah azzawajal ke hi kaam hote hai. roza, taraaweeh wagaira toh hai hi Allaah azzawajal ke magar bahalate roza jo jayiz naukari, jayiz tijarat wagaira ki jaati hai woh bhi allaah azzawajal ke kaam qarar paate hai isiliye iss maah ka naam ramzaan yaani Allaah azzawajal ka mahina hai.

3.   Maahe Ramzaan muasame bahaar hai: Maahe ramzaan, ramdzaa’un se mushtaq hai, ramzaa’a muasame kharif ki baarish ko kehete hai jise zameen dhul jaati hai aur Rabi ki fasl khoob hoti hai chunke ye mahine bhi dil ke gard-o-gubaar dhodeta hai aur iss se amal ki kheti hari bhari reheti hai, issi liye usse ramzaan kehete hai.

  Maahe Ramzaan ki Ahmiyat:

1.   Quran-e-paak me sirf maahe ramzaan sharif ka hi naam liyagaya aur iske fazaayil bayaan huye kisi dusre mahine ka na saratan naam hai na aise fazayil.

2.   Maahe ramzaan ki ek khususiyat ye bhi hai ke Allaah azzawajal ne iss mahine mein Quran-e-Paak naazil farmaya, Chunanche Allaah azzawajal Quran mein irshaad farmata hai; Tarjuma-e-Kanzul-Imaan: Ramzaan ka mahina, Jisme Quran utaara, Logon ke liye hidaayat aur rehenumayi aur faisle ki roshan batein, Toh tumme jo koyi ye mahine paaye zarur uske Roze rakhe aur jo bimaar ya safar me ho toh utne Roze aur dino me, Allaah azzawajal tumpar Aasaani chahata hai aur tum par dushwari nahi chahata aur issliye ke tum ginti poori karo aur Allaah ki badaayi bolo iss par ke usne tumhe hidaayat ki  aur kahe tum haq guzaar ho.

3.   Her mahine mein khaas tarikhe aur taarikhiyoun mein bhi khaas waqt mein ibaadath hoti hai maslan Bakraeid ke chand maqsoos taarikhiyoun me Haj, Muharram ki dasvi taarikh afzal magar maahe ramzaan me har din, Har raath ibaadath hoti hai, Roza ibaadath, Iftaar ibadat, taraaweeh ibadat, soona (sleep) ibaadath, sehari khaana ibaadath.

4.   Maahe Ramzaan ek bhatti hai jaisa ke bhatti gande loohe ko saaf aur saaf lohe ko machine ka purzah bana kar qeemti kardeti hai aur soone(gold) ko zewar banakar istemaal ke layak kardeti hai Aise hi maahe ramzaan gunehgaaron ko paak karta hai aur nekokaaron ke darje badaata hai.

5.   Maahe ramzaan mein Iblees qaid kardiyaa jaata hai aur doozakh ke darwaaza bandh ho jaate hai. Jannat aarasta ki jaati hai. Iske darwaaze khooldiye jaate hai. Isiliye inn dino mein nekiyoun ki ziyadati hoti hai aur gunahoon ki kami hoti hai jo loog gunah karte hai woh nafse ammarah ya apne saati shaitan (Kareen) kehne se karte hai.

6.   Maahe ramzaan ke khaane peene ka hisaab nahi.

7.   Huzur pur noor Swallallaahu alaihi wa sallam maahe ramzaan mein har qaidi ko choorde the aur har sayil ko ataa farmaade the.

8.   Ramzaan me 5 hurf hai:

o   Ra:  Rehemate Ilahi

o   Meem:  Muhabbate Ilahi

o   Dwaad:  Zamane Ilahi

o   Aleef: Amane Ilahi

o   Noon: Noore Ilahi

  Maahe Ramzaan ki Fazilat:

a)    Maahe Ramzaan me ek baar Darood sharif padhna, gair maahe ramzaan me 1 laakh baar Darood sharif padhne ke baraabar hai.

b)   Maahe ramzaan me ek bar SubhaanAllaah padhna, gair maahe ramzaan me 1 laakh baar SubhaanAllaah padhne ke baraabar hai.

c)    Ek riwaayat ke mutaabik arsh uthane waale farishte rozedaar ki duwa par aameen kehete hai.

d)   Aur ek riwaayat ke mutaabik maahe ramzaan ke rozedaaron ke liye dariya ki machliyan iftaar tak dua-e-magfirat karti reheti hai.

e)    Jab maahe ramzaan ki Pehli shab aati hai toh aasmaano aur Jannat ke darwaze khool diye jaate hai aur aakhiri raath tak bandh nahi hote.

f)     Maahe ramzaan me nafl ka sawaab farz ke baraabar aur farz ka sawaab 70 gunah badaa diya jaata hai.

g)    Jo koyi banda iss maahe mubaarak ki kisi bhi raath mein namaaz padhta hai toh Allaah azzawajal uske har sajde ke badle mein uske liye 1700 nekiyan likhta hai aur uske liye jannath mein surkh yaqut ka ghar bana tha hai. Jiss mein 70,000 darwaaze honge aur har darwaaze ke dono pat sone ke bane honge jinn me yaqute surkh jade honge.

h)   Jo koyi maahe ramzaan ka pehla roza rakhta hai toh Allaah azzawajal mahine ke aakhiri din tak uske gunah maaf farmadeta hai aur dusre ramzaan tak uske liye kaffara hojaata hai aur

i)     Har woh din jisme ye roza rakhega uss har roze ke badle mein usse 1000 sone ke darwaazon waala mahal jannat mein ataa hoga aur uske liye subho se shaam tak 70,000 farishte dua-e-magfirath karte rahenge.

j)     Raath aur din mein jab bhi woh sajda karega uss har sajde ke badle usse jannat mein ek ek aisa darakht ataa kiya jayega ke har uske neeche ek ghud sawaar 100 baras tak bhi chale phir bhi uss ek darakht se dusre sire tak na pahunch sake.

k)   Baaz ulama farmate hai ke jo maahe ramzaan me marjaaye uss se sawaalaat-e-Qabr nahi hote.

l)     Qiyaamat mein maahe ramzaan aur Quran rozedaaron ki shafa’at karenge ke maahe ramzaan toh kahega ke Maula azzawajal maine isko din mein khaana peene se rooka tha aur quran arz karega ke Ya Rab azzawajal maine usko raath mein tilaawate-wa-taraaweeh ke zariye soone se rooka.

m)  Jab maahe ramzaan ki Pehli raath hoti hai toh Allaah azzawajal apne makhluq ke taraf nazar farmaata hai aur jab Allaah azzawajal kisi bande ke taraf  nazar farmaye toh usse kabi azaab nadega.

n)   Har rooz 10 laakh gunehgaaron ko jahannam se aazaad farmaata hai 29 raath hoti hai toh mahine bhar mein jitne aazaad kiye unke majmu’aa ke baraabar uss ek raath mein aazaad karta hai.

o)    Phir jab Eid-ul-fitr ki raath aati hai malayika khushi karte hai aur Allaah apne noor ki khaas tajalli farmaata hai aur farishte se farmaata hai aye giroh malayika, unko poora poora ajr diya jaaye Allaah farmaata hai main tumhe gawah karta houn ke maine unn sab ko bakshdiya.

Allaah ki Rahmat se Toh Jannat hi Milegi

Aye Kaash Jagha Unke Muhalle Me Mili Hoo

Sarkaare Madina Swallallaahu alaihi wa sallam ne maahe sha’baan ke aakhiri din bayan farmaya (bayan ka maffum):

1.   Aye loogon tumhaare paas azmatwaala barkatwaala mahina aaya woh mahina  jis mein ek raath aisi bhi hai jo 1000 mahino se behtar hai.

2.   Iss maahe mubaarak ke roze Allaah azzawajal ne farz kiye aur iss ki raath mein qiyaam sunnat hai.

3.   Jo iss mein neki ka kaam kare toh aisa hai jaisa aur kisi mahine mein farz adaa kiye, aur iss mein jis ne farz adaa kiye toh aisa hai jaisa aur dino mein 70 farz adaa kiye.

4.   Ye mahina sabar ka hai aur sabar ka sawaab Jannat hai.

5.   Ye mahina mu’asath(gamkhwari aur bhalayi) ka hai aur iss mahine mein momineeen ka rizq badhaya jaata hai .

6.   Jo iss mein rozadaron ko iftaar karaaye(Ek ghunt dhood ya paani ya ek khajur se iftaar karaye) uss ke gunahon ke liye magfirath hai aur uss ki gardan aag se aazaad kardi jayegi aur iss iftaar karane waale ko waisahi sawaab milega jaisa roze rakhne waale ko milega. Bagair iske ke uske ajar mein kuch kam ho.

7.   Jisne Rozedaaron ko peit bhar kar khilaaye usko Allaah azzawajal mere Hauz (Hauz-e-Kausar) se pilaayega ke kabhi piyaasa na hoga yahan tak ke woh jannat mein daakhil hojaaye.

8.   Ye woh mahina hai iska Awwal(Ibtedaayi 10din) Rahmat hai aur iska usat (Darmiyaani 10din) Magfirat hai aur aakhiri(aakhiri 10din) Jahannam se aazaadi hai.

9.   Jo Apne Gulaam par iss mahine mein takhfeef kare yaani kaam kamle Allaah azzawajal usse baksh dega aur jahannam se aazaad farmadega.

Hadees: Hazrate Abu Hurairah radiyallaahu ta’ala anhu farmaate hai ke Huzur Swallallaahu ta’ala alaihi wa sallam farmate hai “Jab ramzaan aata hai, aasmaan ke darwaaze khool diye jaate hai.” Ek riwaayat mein hai ke “Jannat ke darwaaze khool diye jaate hai.” Ek riwaayat mein hai ke “Rahmat ke darwaaze khool diye jaate hai.” (BUKHARI aur MUSLIM SHARIF)

Hadees: Hazrate Abu Hurairah radiyallaahu ta’ala anhu se riwaayat hai ke Huzur–e–Aqdas Swallallaahu ta’ala alaihi wa sallam ne farmaaya ke “Ramzaan aaya ye barkat ka mahina hai Allaah ta’ala iske roze tumpar farz kiye, Iss me aasmaan ke darwaaze khool diye jaate hai aur doozakh ke darwaaze bandh kar diye jaate hai aur sarkash shaitaanon ke tauqe daal diye jaate hai. (NASAI SHARIF)

Hadees: Hazrate Sahal ibne Saad radiyallaahu ta’ala anhu se marwi hai ke Rasoolullah Swallallaahu ta’ala alaihi wa sallam farmate hai “Jannat mein 8 darwaaze hai, unme ek darwaaze ka naam RAIYYAAN hai uss darwaaze se wahi jaayenge jo roze rakhte hai. (BUKHARI)

Hadees: Hazrate Abu Hurairah radiyallaahu ta’ala anhu se riwaayat hai ke Rasoolullah Swallallaahu ta’ala alaihi wa sallam ne farmaaya “Jo Imaan ki wajah se aur sawaab ke liye ramzaan ka rozah rakhega uske gunaah bakhsh diye jaayenge aur jo imaan aur sawaab ki niyyat se ramzaan ki raaton me qayaam karega (Nawaafil padhega) uske agle gunaah maaf kar diye jaayenge. (BUKHARI, MUSLIM SHARIF)

Hadees: Hazrate Abu Hurairah radiyallaahu ta’ala anhu se riwaayat hai ke Huzur-E-Aqdas Swallallaahu ta’ala alaihi wa sallam irshaad farmate hai agar kisi ne ek din nafl roza rakha aur zameen bhar usse soona diya jaaye jab bhi uska sawaab poora na hoga. Uska sawaab toh qayaamat hi ke din milenge. (TIBRANI)

Hadees: Hazrate Abu Hurairah radiyallaahu ta’ala anhu se riwaayat hai ke Rasool-E-Akram Swallallaahu ta’ala alaihi wa sallam ne farmaaya “Har cheez ke liye zakaat hai aur badan ki zakaat roza hai aur roza aadha sabr hai. (IBNE MAAJAH) 

Hadees: Hazrate Abu Masood Gaffari radiyallaahu ta’ala anhu se riwaayat hai ke Huzur-E-Aqdas Swallallaahu ta’ala alaihi wa sallam ne irshad farmaaya “Agar bandon ko maalum hota ke ramzaan kya cheez hai toh meri ummat tamanna karti ke poora saal ramzaan hi ho. (IBNE KHUZAIMA)

Hadees: Hazrate Salmaan Farsi radiyallaahu ta’ala anhu se riwaayat hai ke Huzur-E-Aqdas Swallallaahu ta’ala alaihi wa sallam ne irshaad farmaaya “Ramzaan ki raat mein Qayaam(namaaz padhna) sunnat hai, jo isme neki ka koyi kaam kare toh aisa hai jaise aur kisi mahine mein farz adaa kiya aur isme jisne farz adaa kiya toh aisa hai jaise aur dino mein 70 farz adaa kiye. (BAIHAQI)